Во редот на познатите бунтовни Малешевци, македонски патриоти, револуционери и борци за национална и за социјална слобода на македонскиот народ: легендарниот војвода Дедо Иљо Марков Малешевски, организаторот и водачот на Разловечкото и Кресненското - Македонското востание Димитар Поп Ѓорѓиев Беровски, бунтовниот поет и социјалист Атанас Раздолов, свое достојно место си обезбеди и Никола Петров Чукарски - Русински (1875 - 1943). Истовремено Русински израсна во една феноменална личност на македонското национално-ослободително движење од крајот на 19 и почетокот на 20 век и со право се вбрајува во плејадата македонски национал - револуционери, кои со својот ентузијазам и неуморна работа меѓу народните маси во Македонија ја вгнездија, ја проширија и ја зацврстија Македонската револуционерна организација и ја изведоа илинденската епопеја од 1903 година.